ಹರಿಯುತಿರ ಜಲಪಾತದಂತೆ

ಹರಿಯುತಿರ ಜಲಪಾತದಂತೆ
ಶುಭ್ರದಿ ಮಿನುಗುವ ನಿನ್ನ ಉಡುಗೆ
ಬಳ್ಳಿಯು ಮಾಮರವ ಸುತ್ತಿದಂತೆ
ನನ್ನ ತೋಳನು ಹಿಡಿದು ನಡೆದ ಆ ಗಳಿಗೆ

ಕೇಶವ ನೇವರಿಸಲು ನಿನ್ನ
ಆಸೆಯ ಮಿಂಚು ಹೊಳೆಯಿತು ಕಣ್ಣಲ್ಲಿ
ತುಟಿಯಂಚಿನಲಿ ಮೂಡಿತು ನಗುವು
ಶೀತಲ ಚಂದಿರನಂತ ನಿನ್ನ ಮೊಗದಲ್ಲಿ

ಕದ್ದು ಮುಚ್ಚಿ ನೀ ನನ್ನ ಕಂಡಾಗ
ಮನಸ್ಸಲ್ಲಿ ಪ್ರೇಮರಾಗ ಮೀಟಿತಾಗ
ಹರಿಣಿಯಂತೆ ಸೆಳೆವ ನಿನ್ನ ಅಂದ ಸವಿದಾಗ
ನಿನ್ನ ಸ್ಪರ್ಶದಿ ಬೆರೆತು ಈ ಜಗವ ಮರೆತಾಗ

ಕನಸಿನ ಚಿತ್ತಾರದಿ ನಾ ಕಂಡ ಚೆಲುವೆ
ಬಾಳಿನ ಪುಟದಲ್ಲಿ ಒಂದಾಗು ಒಲವೆ
ಪ್ರೀತಿಯ ಪುಷ್ಪಗಳ ನಿನಗೆ ಅರ್ಪಿಸುವೆ
ಹೃದಯದ ದೇಗುಲದಿ ನಿತ್ಯ ಪೂಜಿಸುವೆ

ರಚನೆ: ಶಶಿಕುಮಾರ್ ವಿ. ಕುಲಾಲ್