ನೀ ಎಲ್ಲಿ ಮರೆಯಾದೆ

ಬಾಳಿನ ಕಡತಕೆ ರಂಗನು ಚೆಲ್ಲಿ
ಎಲ್ಲಿ ಮರೆಯಾದೆ ..... ನೆನಪ ಸುಳಿಯಾದೆ
              ಗೆಳತಿ ..... ಯಾಕೆ ಹೀಗಾದೆ
ದುಗುಡವ ಮರೆಸಿ ಹುರುಪನು ತುಂಬಿ
ಎಲ್ಲಿ ನೀ ಹೋದೆ .... ಈ ನೋವು ತಾಳೆನೇ
              ಗೆಳತಿ .... ದುಃಖವಾ ಸಹಿಸೆನೇ

ನನ್ನಯ ಕಂಗಳಲಿ ಕನಸನು ತುಂಬಿ
ಬದುಕುವ ಆಸೆ ನೀ ತೋರಿಸಿದೆ
ಬಾಳಿನ ಪುಟದಲಿ ಹೊಸ ಅಧ್ಯಾಯ ಬರೆದು
ಅರ್ದದಿ ನಿಲ್ಲಿಸಿದೆ ..... ಎಲ್ಲಿ ಮರೆಯಾದೆ

ನಿಸ್ತೇಜವಾದ ಮೊಗದಲಿ ಹರುಷವ ತುಂಬಿದೆ
ಅಂತರಾಳದಿ ಬಯಕೆಯ ಚಿಗುರು ತುಂಬಿದೆ
ನವಿರಾಗಿ ಚಿಗುರಿದ ಆಸೆಯ ಮೊಳಕೆಯ
ಚಿವುಟಿ ಯಾಕೆ ಹೋದೆ .... ಎಲ್ಲಿ ಮರೆಯಾದೆ

ಚಿಗರೆಯಂತೆ ಹಾರುತಾ ಮನದೊಳಗೆ ನುಗ್ಗಿದೆ
ಕನಸಿನಾ ಸೌಧವಾ ಅಲ್ಲಿಯೇ ಕಟ್ಟಿದೆ
ಹಾಡುತಾ ಕುಣಿಯುತಾ ಹೃದಯಾಂಗಳದಿ ಮೆರೆದೆ
ನಮ್ಮಿಲನ ಸನಿಹವಿರುವಾಗ..... ನೀ ಎಲ್ಲಿ ಮರೆಯಾದೆ

ರಚನೆ: ಶಶಿಕುಮಾರ್ ವಿ. ಕುಲಾಲ್