ಚಿಮ್ಮಿತು ಪ್ರೀತಿಯ ಚಿಲುಮೆ

ಚಿಮ್ಮಿತು ಪ್ರೀತಿಯ ಚಿಲುಮೆ ಕಂಡಾಗ ನಿನ್ನನು
ತುಟಿಯಲ್ಲಿ ನಿನ್ನ ಅಂದು ಕಂಡಾಗ ನಗುವನು
ಎಷ್ಟೊಂದು ಮಧುರ ಕಳೆದೊಂದು ದಿನವದು
ಕಂಗಳ ನೋಟ ಬೆರೆತಂತ ಕ್ಷಣವದು

ಪ್ರೀತಿಯ ಗುಲಾಬಿ ಕೊಟ್ಟಾಗ ನಿನ್ನ ಕೈಗೆ
ನಾಚಿ ನೀರಾದೆ ಕೆಂಪುಗೆನ್ನೆಯ ಸೊಬಗೆ
ನನ್ನ ಕೈಯಲ್ಲಿ ನೀ ಕೈ ಜೋಡಿಸಿದಾಗ
ಜೋಡಿ ಹಕ್ಕಿಗಳಂತೆ ಮನ ಹಾರಿತಾಗ

ಹೀರಿದಾಗ ಜೊತೆಯಾಗಿ ಹಣ್ಣಿನ ರಸವನು
ಕರಗಳಲಿ ರೋಮವು ಜುಮ್ಮೆಂದ ಕ್ಷಣವನು
ಮರೆಯಲಾರೆ ಎಂದಿಗೂ ಮೊದಲ ಭೇಟಿಯನು
ಕಳೆಯೋಣ ಪ್ರತಿಕ್ಷಣ ಸವಿಯುತ್ತಾ ಬಾಳರಸವನು

ರಚನೆ: ಶಶಿಕುಮಾರ್ ವಿ. ಕುಲಾಲ್